Kea ‑tooi" powlu 'de ɛɛ' ‑gbu" 'a 'kao kpiin' "kpei
74
Asafʋ 'a tɔ' "kpei naadɩ‑.
'Oo Kea ‑apʋ ‑nɩa ‑ma 'blae ‑ɩn ‑tea 'dei ɛ,
dɛɛtɩ‑ ‑ɩn ‑to ‑a 'kpʋ "i ‑wɛe ‑ɩn ‑ka" e "jrii 'de ‑a ‑pee ‑ɛ?
2 ‑Ɩn po ‑ma 'blʋa ‑ɩn ‑sa 'e mu sese 'a ‑tɩ' ‑kwlʋ o:
‑Ma 'cɛ ‑o ʋʋ ‑teɛ ‑ma ‑tea',
‑ɩn po Selisalɛmʋ ‑ɩn ‑tia" "kpei 'a ‑tɩ' ‑kwlʋ o.
3 ‑Ɩn ji ‑ɩn ‑je ɩa' 'kao kpiin' 'je,
‑aa tʋnyʋ ‑gba' ‑aa "nyɩɩna' ‑wee'‑ ja.
4 ‑Ma tʋnyʋ ‑te' ʋʋ je 'wɔn 'de ‑ta ‑ɩn ‑ke ‑aa ‑gbʋan',
‑wɛe ʋʋ po dɛ ‑toɛ ka ʋʋ kpa tʋ 'a "jru "jɛi.
5 Ʋʋ toɛ ʋʋa' tʋfɔn' dɩ "jɛi ka tu dbai a ‑tea' ‑gbo" ‑pa ja,
6 ‑wɛe dɩ "klein ʋʋ ‑pa' ʋʋ waa ɩ ‑wee'‑ i:
7 ʋʋ poɛ Kea ‑gbu "jri,
dɩ ‑nɩa 'de ɩ 'di ʋʋ 'tɛn i ‑wee'‑ 'mɛ,
‑wɛe ‑ta ‑ɩn ‑nɩa ʋʋ ‑sɛ ‑gban'.
8 Dɩ ʋʋ naa tɔ' "kpei ɛmɛ ‑nɩ:
‑aa muɛ ʋʋ ‑wee'‑ 'a ma" i ‑saa' ‑ta ‑due.
‑Ta 'oo ‑ta nyɔ ɔ ‑gbɛɛa' ‑mɔ Kea "juɛi ʋʋ poɛ ‑mɩ ‑wee'‑ "jri.
9 Jrii' jrɛ' 'ɛ nʋʋɛ‑, wlu 'kwa jaa i jrɔ' se nɩ‑,
nɔ" ‑jɛɛ 'di ɛ 'jea "ti nyɔ jrɔ' seɛ juuo‑.
10 'Oo Kea, nɔ" ‑jɛɛ 'di ‑ma 'ʋnyɛi 'je
‑ma wɛin blaa ‑tɩ 'bɔ ‑ɛ?
‑Wɛe ‑ma tʋnyʋ 'je ‑ʋn ‑cree"‑ cruu?
11 Dɛɛtɩ‑ ‑maa' nʋ dɛ jrɛ' ‑ɛ?
‑Ɩn ‑bo sʋn 'saa: ‑ɩn ji ‑ɩn ‑je ʋʋpʋ‑ 'a ma" i ‑sa?
12 'De ‑mɛ 'oo Kea, ‑ɩn nɛ 'ma Tʋ "bo ‑o,
‑ɩn ‑nɩ' tɛin" sese.
‑Mɔ ‑ɔɔ seie ‑aʋn ‑ta ‑wee'‑ "klein 'de 'blʋa "kpei.
13 ‑Mɔ ‑sa 'tɔniɛ 'fɔ 'de ‑ma "ikmaa' 'ʋn,
‑mɔ ‑waa nmi klae" ‑nɩa 'de "ni ‑sɔn 'ɔ "jru i,
14 ‑mɔ ‑waa ‑sre" klaa" ‑nɩa 'de "ni ‑sɔn 'ɔ "jru i,
‑wɛe ‑ɩn ‑nyɩɛ" ‑smii' 'a klae" ‑nɩa 'de "ni ‑sɔn ɩa jeɛ di.
15 ‑Mɔɔ nʋɛ ‑wɛe ‑tu" uu ni a ‑si' ‑gbuu ɛɛ nʋ "ni klaa".
‑Mɔɔ nʋɛ ‑wɛe "ni ‑ɩa' ma 'de ɛ, ɩa jea ma.
16 ‑Mɔ ‑ble ‑sɔn, ‑mɔ ‑ble kwie‑, ‑Mɔ ‑nʋ' 'cʋ ke 'jrʋ ke‑.
17 ‑Mɔ ‑po' 'blʋa 'a ‑paʋn, ‑mɔ ‑nʋ' ‑kuua" ke ‑fʋʋɔ ke‑.
18 ‑Ɩn po ‑tɩ' ‑kwlʋ o 'dee 'oo Tʋ "bo,
ka ‑ma tʋnyʋ a ‑cree"‑ a ‑ʋn,
‑wɛenyʋ ‑sea' tɔ' 'di nɩ a 'fa ‑ʋn "i.
19 ‑Ɩn ‑bo ‑ma ‑gbɔ'lɛ wɔnkma nmii "nyɩ ɛ,
‑wɛe ‑ɩn ‑bo ‑ma 'cɛ ‑ʋʋ ‑kae" a "jrii 'a ‑tɩ' o "maea cruu,
20 ‑ɩn po ‑ma dbɛɛdɛ 'ɛ ‑tɩ' ‑kwlʋ o,
dɛ ‑nʋɛ ɛmɛ ‑nɩ ‑aa 'kle cɛn "jri "kpei ‑tie"
‑wɛe 'blʋa 'a 'fɔ ‑tɛɛan o ‑ɛ ‑nɩa ‑flaan" ‑flaan nɩɛ 'de ɩ ‑wee'‑ "klein "kpei.
21 ‑Ɩn ‑bo nyʋ ʋʋa ‑tua" 'kle "itaiɛ ʋʋ ke ‑tɩn' 'bode muɛ.
Nɩa" i ke wɛenyɔ ke‑ ʋʋ 'je ‑ma 'nynɩ "i 'bɛɛ‑ dɛwɛdiɛ.
22 ‑Ɩn ‑sɔn 'ʋn 'oo Kea, ‑ɩn ‑tmʋ ‑ma "kpei ‑tɩ.
Nyʋ ‑sea' tɔ' 'di nɩ ‑bo ‑sɔn' ‑sɩn' 'sʋ dɛ ʋʋa ‑creea" ‑ʋn mamaʋ 'sʋ
kwie a kpʋan, ‑ɩn po ɩa' ‑tɩ' ‑kwlʋ o.
23 ‑Ɩn ‑bo ‑ma "cɛi o nʋʋ 'a ‑cnuɛn" o,
‑ma tʋnyʋ 'a ‑cnuɛn" ‑ɛɛ jia ‑ʋn o jeejee 'a ‑tɩ' o "maeɛ.